讚好活動
運動唔再係有錢人專利：凝動基金用兩年訓練幫基層孩子
一班體育界人士睇唔過貧富差距拉闊咗下一代嘅運動機會，於是成立基金，用兩年持續訓練幫基層學生追上起跑線。
以前細路想做運動，父母帶去遊樂場跑幾個字就得。但今日，足球、籃球、曲棍球、體操、跑步、跳繩，每一項都變得好專門，教練費同訓練費越嚟越貴，草根家庭根本好難負擔。遊樂場嘅玩意，慢慢變成中產同富裕家庭幫仔女砌靚CV嘅工具。喺呢個背景下，一班有心人成立咗凝動香港體育基金，希望集合各界力量，令基層孩子唔會喺運動呢條路上輸喺起跑線。
點解要搞呢個基金？
創辦人之一係體育教師陳俊傑（Zimon）。佢同朋友成立基金，主要係眼見社會上貧富差距愈來愈大，有錢家庭可以畀仔女參加昂貴嘅體育興趣班，但基層家庭嘅細路就只得個望字。Zimon同另一位創辦人細個時都受過運動好深嘅影響，覺得社會用咗好多資源培育佢哋，所以佢哋要用自己嘅能力同人脈去回饋社會，用運動去影響新一代嘅基層少年。
運動點樣改變人生？
Zimon認為，運動可以培養學生嘅自信心、抗逆能力、合作性同自律。呢啲品格無論對學業定係將來嘅人生發展都好重要。佢話：「好多小朋友可能冇得揀自己嘅出身同家境。但如果我哋可以幫佢哋培養呢啲品格，絕對可以提升佢哋嘅競爭力，迎接將來嘅挑戰。」基金而家係由Zimon同一班朋友用工餘時間營運，佢感恩運動界嘅人脈幫咗好多手。雖然營運基金好辛苦，但眼見基金確實做到當初成立嘅信念，參加者透過訓練改變到自己人生，佢覺得一切都好值得。