讚好人物
校長唔一定「惡」：馬鞍山靈糧小學陳美娟的親民作風
「説實話，我從沒想過當校長。」
馬鞍山靈糧小學嘅校長陳美娟，外表唔似傳統校長咁嚴肅，反而有啲「明星相」，笑容燦爛，講嘢爽直。佢自己都話，當年去校長面試嗰日，幾乎唔記得係面試日，冇特別準備就本住「大無畏」精神去試。面試完咗，遴選委員問佢覺得自己喺佢哋心目中印象點樣，佢答咗一句「牙尖嘴利」，全場即刻大笑——原來佢哋都係咁諗。
十年校長，唔靠權威靠親民
陳美娟校長今年踏入做校長嘅第十年。佢早年做教師時已經同學生打成一片，好多人都話從外表睇唔出佢係老師。佢笑言，如果以當年嘅標準，佢係絕無可能做到校長嘅。呢種放下權威嘅風格，令學生樂意同呢位「大姐姐」相處，亦令佢贏得同事同學生嘅喜愛。
去年，香港教育行政學會第一屆「卓越教育行政人員獎勵計劃」頒獎，陳校長拎到呢個「重量級」大獎。佢話得獎梗係開心，但每日見到小朋友期待返學嘅笑容，仲更加喜悦。
鼓勵揾答案，唔係俾答案
學校入面有個「靈糧思考區」，定期出啲有趣題目俾全校同學一齊拆解。題目多數由生活出發，冇既定答案。陳校長話，係要培養孩子嘅好奇心同觀察力，等佢哋習慣自己揾答案，唔係淨係等老師俾個model answer。
多年嚟，陳校長拎過行政長官社會服務獎狀同「卓越教育行政人員」獎。佢認為，教育工作首要是自愛同愛小朋友，身教遠比言教重要。對準備入行嘅後輩，佢提醒佢哋除咗要有熱誠，仲要裝備好同學生、家長、同事溝通嘅能力。